شبت نار ودلال وعلوم رجال

[الوسم]

	سهرة شعبية مع حسن بن عمار الجبيل المطيري ( المرتاح) اسعد الله مساء الجميع هذي فكرة راودتني انا ومعدي النايفة على عمل سهرات شعبية نتحدث بها عن شخصيات مهمة في منتدانا وستكون هذه اول حلقة مع الشيخ / حسن بن عمار الجبيل المطيري ( المرتاح) ونتمنى ان تحوز هذه السهرة على رضاء الجميع . مضمون السهرة هي جلسة على شبة نار ودلال ويصير حوار بيني وبين معدي وذكر من يستحقون الذكر ويتخللها ابيات في مدح من نتحدث عنه بالسهرة والقصيد من كتابة معدي النايفة حتى ما اذكرة باسمي نبدأ سهرتنا التى نتمنى ان تنول على رضاكم واستحسانكم ********************************** الوسم : السلام عليكم مساك الله بالخير يامعدي معدي : ياهلا ومرحبا بالوسم مسيك بالنور والرضا الوسم : يازين بيت الشعر وشبت النار والدلال تدخلني بجو ثاني معدي : أفا عليك بس أزهل الامور مدام معدي موجود تبي تنومس بالبيت والنار والدلال معدي : الا على طاري علوم الرجال والدلال ابي اسمعك قصيدة كاتبها وعطني رايك فيها في ابو فهد الوسم : ايه مهو قالولك قاعد مع غسان مهو بالوسم ..........سمعني معدي : الشعر حاضر بالمشاعر على الزام يدفع من الجزلات ويقدم أزهار والطيب له ناس يرزون الاعلام ومايحسبون حساب درهم ودينار في مدحهم يالوسم تحتار الاقلام لو تكتب الابيات موفت بالاقدار هذا كلام اللي عن الحق ماصام اسمع كلامه وأبلغة لابن عمار ذكرى مواقيفة على مر الايام تبقا ولو دورات الايام تندار لعل يفدونة من الناس الاقزام والله يحفظة من مقاريد الانظار الوسم : الله الله الله صح السانك يامعدي ويستاهل ابن عمار كل طيب الوسم : الا على طاري ابن عمار وهالقصيدة يامعدي عندي اسئلة كثير عن أبو فهد معدي وشنهي اسئلتك يمكن تلقا عندي الاجابة الوسم : حسن بن عمار الجبيل ابو فهد رجل اعمال شاب معرروف عنه العلوم الغانمة والطيب وله الكثير من المواقف اللى تشهد له كيف عرف منتديات الارطاوية معدي : اول علمني ثم اعلمك الوسم : وش اعلمك عنه معدي : انت تقول له مواقف كثيرة وشنهي هالمواقف الوسم : اييييييييه تبي تعرف المواقف اول صبلي فنجال وعطني القدوع وخلني اكيف الراس وابشر بالعلوم اللى تبيها معدي : ابشر بالقدوع وبالفنجال الكايف اللى ينومسك ويكيف الراس الوسم : ياسلالالالالام على هالفنجال عزالله انه يقعد الراس..... الا اللى مسوي القهوة من ؟ معدي : ايه والله اني داري انك تبي تخربها وماعمرك كملتها صح اقول عطني اللى عندك بس قبل العلم الاخر الوسم : ههههههههههه يابن الحلال امزح معك واستلم الاجابه على سؤالك معدي : اسلم الوسم : ابو فهد ايادية بيضاء واعماله كثيرة ولاأقدر احصرها لك بسهرتنا هذي لكن بعلمك في بعض اللى اعرفة عنه ابو فهد ماقصر بميزاين مطير ذيك السنه وهو من عمل المزايين لقبيله مطير وصاحب الفكره و أحد الداعميين الرئيسيين ونجح المزاين بفضل الله ثم بفضل ابو فهد وبفضل الرجال الطيبين كله وفاء لقبيلته ولبني عمه وتجمعهم معدي : عزالله صحيح الوسم : ابو فهد دعم الكثير من الطلاب اللى درسوا بالخارج ولاقصر معاهم سواء من ابناء القبيلة والا من غيرها معدي : عزالله صحيح الوسم : ابو فهد دعم كل تجمع لمطير ولشعارها المشاركين بالمسابقات ماديا ومعنويا بحضوره وتشجيعه معدي : عزالله صحيح الوسم : ابوفهد ماقصر بدعم المحتاجين والاسر العفيفة ووقوفة بجنبهم معدي : عزالله صحيح الوسم : ابو فهد ماقصر بدعمه للجمعية الخيريه بالارطاوية وللمعاقين معدي : عزالله صحيح الوسم : ابو فهد ماقصر بدعم المنتدى والمسابقات اللى تحصل فيه معدي : عزالله صحيح الوسم : انت وراك علقت على عزالله صحيح معدي : لان اللى ذكرته صحيح بصحيح بصحيح الوسم : يالله الحين جاوب على سؤالي وش عرف ابو فهد بمنتديات الارطاويه معدي : على خشمي وابشر بمن يعلمك الوسم : قبل لاتعلمني عطني بياله شاهي معدي : الله يبلشك كانك علة صب شاهي صب قهوة خذ الشاهي عساااك ... الوسم : عساي وشنهو معدي : عساك تشربة بالعافية الوسم : ايه اشوى معدي : تقهويت ...........يالله هذي اجابة سؤالك الوسم : تفضل معدي : والا لا والله ماعلمك لين تقول كم بيت على وزن قصيدتي وقافيتها في ابن عمار الوسم : طيب طيب .. على خشمي الوسم : الشعر حاضر والمشاعر له أنغام تعزف على لحن القوافي بالاوتار يامعدين بالنايفة محف الاقدام مالي عذر يوم اتعذر بالاعذار انشهد اني مبصمله بالابهام ابو فهد ابي امدحة سر واجهار للطيب راسي مثل ابانات وجهام وملاذ للي شاكي صدوف الاقدار معدي : صح السانك يالوسم الوسم : صح ابدنك يالله جاوبني معدي : حاظر وعلى خشمي حسن بن عمار احد أبناء قبيلة مطير واحد ركائز هذه القبيلة مع انه رجل اعمال ومتعلم ومثقف الا انه بدوي ويعشق البداوة ويعشق الابل ومعطيها اكثر وقته الوسم : ماشاء الله عليه والله يكثر من امثالة معدي : ذيك السنة نزل بحلالة حول الارطاويه ويوم درى عنه الشيخ / مسير بن سلطان راح زارة ومعه ابو محمد مقبل المشرافي تذكر يوم ابو محمد ينزل موضوع في ضيافة حسن الجبيل الوسم : ايه اذكر الموضوع معدي : هاه ذاك الوقت زاروا ابو فهد وبدت معرفته الشخصية بالمنتدى وقتها وكان ابومحمد يعمل لتغطية الزيارة وتطرقوا للمنتدى وبان المنتدى يهتم بشؤون المدينة ومايتعلق بها ويهتم بالتغطيات واحتفالات الأرطاوية بتغطية حفلات شعار المدينة واعجب ابو فهد بالمنتدى وتغطيته وبما ان المنتديات يهتم بشؤون المدينة قرر ابو فهد ان يكون احد الركائز الاساسية للمنتدى واحد الداعمين له كعادتة وهذا بداية عشق ابو فهد للمدينة ولاأهلها ولمنتداهم ولما للمنتدى من أهمية كبيرة للارطاويه وبانه يمثل الواجهة الحقيقة للمدينه فالطيب يعشق اهل الطيب ومواقف ابو فهد واضحة للجميع وخدماته وطيبة طال غالبية القبائل فما بالك بمنتدى الارطاويه وهذي عوايد ابو فهد وعساها بميزان حسناتة ويجزاه كل خير الوسم : بيض الله وجهك على هالمعلومه وبيض الله وجه ابو فهد وجزاه الله كل خير وعوايد اهل الطيب سباقين للطيب معدي : يستاهل ابو فهد ولو بنتكلم عنه ماراح نوفيه حقة يالوسم لكن يكفينا فخر انه احد منتسبي منتديات الارطاوية والداعمين لها وهذا بحد ذاته فخر لنا ولمنتديات الارطاويه الوسم : عزالله صدقت يامعدي ومن قدم الطيب لابد يلقاه الوسم : عزالله استانست بالسهرة معاك يامعدي لكن مثل منت عارف لازم امشي الحين للكويت وراي درب وباذن واحد احد لى جيات وجيات وسهرة مثل هالسهرة مع شخصية جديدة قريبا معدي : ايوالله انا تنومسنا بعلوم الطيبين وعساك ماتشوف شر يالوسم ودير بالك على الطريق الوسم : ان شاء الله مع السلامه معدي : بحفظ الرحمن وماتشوف شر مع الف سلامة

[أمير الاحساس]

فكرة رآآآئعه واسلوووب رآآآقي اخوي الوسم واخوي معدي النايفة

الله يبيض وجيهكم

وأبو فهد يستاهل ما قيل فيه وأكثر

وصح الله لسانكم

[الوسم]

هلا وغلا أمير

ابو فهد رايتة بيضاء ومهما تكلمنا ومهما قلنا فلن نرتقي الى ربع افعاله والموضوع انما هو تعبير من أعضاء المنتدى وتقدير لابو فهد ولرد جزء لايذكر من الجميل الذي اغرقنا فيه ابو فهد

لاهنت على المرور امير

[ابتسم انا هنا]

ماشاء الله على هالجلسة الطيبة والوجيه اللي ماتنمل
وجعله مجلسن عامر بأهله
واشهد ان سوالفكم توسع الصدر واعلومكم سفرة
أجتمع فيها خواطر الوسم وقوافي معدي وطيب الذكر ابو فهد
خلاص والله ماعاد ادري وش أمدح وش أخلي ؟!
وننتظر الجلسة الجاية عز الله اني اشتقت لها

[الوسم]

ياهلا والله يابو فرحان الله يعزك يالغالي والف شكر لكلامك الطيب

لاهنت على مرورك الراقي كالعادة والمتميز

تحياتي واحترامي لشخصك الكريم

[راعي الشبح]

أيه هين ماعزمتوني
بس اعجبني معدي بكلمة عزالله صح ياالوسم جبله حاجه مايعرفها هههههههههههههه

الوسم معدي بيض الله وجيهكم على هاالقاء عزالله ابدعتم لا أملك كلام اعبر الكم به غير وفيتم وكفيتم ولكم مني جزيل الشكر والعرفان

[الوسم]

اقتباس : المشاركة الأصلية كتبت بواسطة راعي الشبح [ مشاهدة المشاركة ]

أيه هين ماعزمتوني بس اعجبني معدي بكلمة عزالله صح ياالوسم جبله حاجه مايعرفها هههههههههههههه الوسم معدي بيض الله وجيهكم على هاالقاء عزالله ابدعتم لا أملك كلام اعبر الكم به غير وفيتم وكفيتم ولكم مني جزيل الشكر والعرفان

ياهلا وكل الغلا براعي الشبح ومعدي دواه عندي :)

اسعدني مرورك وتعليقك ياراعي الشبح


كل التقدير والاحترام لشخصك الكريم

[فواز الجوفي]

افا افا يالوسم انت ومعدي

وراكم ماعزمتوني على السمره والجلسه الطيبه

ولا سريه اللغايه

هههههههههههه

ماقصرتو طال الله في اعماركم وعمر السامع

فكره جميله ومتجدده

[الوسم]

وطال عمرك يالجوفي وبيض الله وجهك على المرور


لاهنت

[Ř ξ Đ]

سهر ولا احلى ..وأجبتني فكرة الموضوع الجوهنميه ^_^
وبيض الله وجهك بو سعد وبيض الله وجه أبو طيف
وبلا شكـ, أبو فهد يستآهل كل خير رجل أياديه بيضاء ..جزاه الله الف خير على كل ماقدمه ..وزاده من فضله ...